غزل
زمانه موم کیمی ازدی وقار و همتیمی
داغتیدی یئل کیمی بیر گوز ورومدا شوکتیمی
توکولدی باشیمه دوت سمتیدن کدر داغ تک
آلیب دی صبریمی الدن اپاردی طاقتیمی
کفیم سازیدی منیم یاخشی گئت گلیم واریدی
یامان داغیتدی باشیمدان فلک جلالتیمی
آغارتدی باشیمی گیزلنجه تل به تل سسیز
گوزوم باخاباخا نامرد اگدی قامتیمی
ایلان کیمین منی چالدی گئجه گونوز سوزلر
زهر قاتیب اجیلاندیری دادلی شربتیمی
گونون گون اورتا چاقییندا ایتیردیم عمریمی من
بیر عمردور گزورم چول به چول صداقتیمی
مگر کیمین آهی دوتدی بئله ذلیل اولدوم
کیمین حسدلری یاندیری الده قسمتیمی
سووشدی عمر قالیب دیلده چوخلی خاطره لر
گوزوم یاشلا کرگ باشلیام کتابتیمی
اسنده صبح نسیمی منی ائدور مدهوش
بیر از ازالدیری دیلدن ملال و محنتیمی
نصیبیم اولسا اگر بیرده نازلی یاری گورم
کرگ دییم اوزی عفو ائیله سین جسارتیمی