آیریلیق
بس  منی سیخدی  زمانه  اورگیم  قان  اولدو
سرداشیم  اولمادی عالم  منه  زندان    اولدو

اوتورا بولمدیم  ائوده  قاپییا    بویلاندیم
بلکه جان صاحبی  بیر لحظه  نمایان اولدو

سایدیم  اولدوزلاری   بیر بیر او قرانلوق  گیجه ده
اغلادیم  صبحه قدر گوزده کی  یاش  قان اولدو

هی گوزوم یاشینی توکدوم یوزه هجران گیجه سی
قالدی یوللاردا گوزوم صبر ائوی ویران اولدو

بیر کسیم اولمادی  سرداشیم  اولا غملی  گونوم
قورتارام  جانیمی غمدن  مگر امکان  اولدو

آیریلیقدان باشیما گلدی  نه لر کیمدی بیلن   
سئل  کیمی غم  توکولوب باشیمه عمان  اولدو

تانری چاره م ندی عشقین قوشی باغیمدن اوچوب
بولمورم گئتدی هارا  کیملره مهمان اولدو

بیلمیرم یول اوزاق اولدو کی گلیب چئخمادی یار
یا وفاسیزلیق ائدیب اوزگیه جانان اولدو

اولما  مندن اورگی سیندی داها گلمیجک
یا کی اوز باغلادیقی عهدینه پشمان اولدو

یارین عشقیله گئچدیم گئجه می گوندوزومی
وصلینی آرزیلادیم قسمتیم هجران اولدو

آیری بیر سوز دئمرم ساغلیقینی آرزیلارام
بلکه گلدی یئنه اولده کی دوران  اولدو

هوشمند